Jita a Laion n sada ai 30 de auril 2011

La jita ie unida urganiseda adum cun la lia da mont. Son muec dala 7 daduman de 12 cun auti privac y furnei do la statela per Tluses. Do l hotel Hubertus dal ncreusc per furné su a Laion ons lascià i auti y jic su per n troi dl viers de Laion. L tëmp a judà pea ajache l fova nia frëit y mez asniblà, nscì òns abù la feruna de udëi plu sortes de uciei nscì nce 2 gialëc de mei (Wiedehopf) che speran propi de udëi. L pudova vester mandl y baibl che se tën su ilò per fé coa. L mandl ons nce audì ciantan upuup, upuup... On nce audì l raidacë (Wendehals) y l granelin d'or (Goldammer). On udù nce tupes dala culieria (Ringeltaube) y l granelin (Zippammer). Chisc ie i uciei plu nteressanc che on udù. Son cherdei pona a Laion a se bever zeche y dochël jic ju per n auter troi nfi pra streda dal Torggler y pona de reviers nfin pra i auti. Per marënda fans inò a cësa.

L raion danter Laion y Pontives cun si prei, lëns de uni sort, sienes y vedli mures ie unich lonc y lerch. L pieta a uciei, pavëi y autri pitli tieres n habitat ideel. Chiche uel se n muciè n puëch da nosc mond modern y dal stress de uni dì, ruva ilò te n raion naturel ulache n possa di che l mond se à fermà. Uni sajon pieta ilò autra emozions y l ie da speré che l resta mo giut nscì y che duc chi tieres possa vester inant i patrons de chël raion.