|
Chësta nrescida fata sun ncëria dla “Arbeitsgemeinschaft für
Vogelkunde und Vogelschutz Südtirol – AVK” à l fin de fé n miëur
cheder sun la migrazion y l sëuranverné di grifons te Sudtirol.
Nce nosta provinzia vën tucheda dala migrazion di grifons,
dessegur nia te chëla mesura sciche ti posć plu cunesciui per
chësc. Minà iel tlo Gibraltar, l Bosporus, l “Stretto di
Messina” y n.i. Chëi posć à mpue na funzion de puent, ajache i
permët a cër grifons de passé l mer ulache l ie l plu strënt.
Sëura l mer ne se forma deguna termiches y chësc ie ntan la
migrazion na deficultà mplu per i uciei che cëla de sparanië
energies y se nuzea dla termiches che i porta su alauta ulache i
possa se la sbriscé inant (a chisc ti dijen “Segelflügler-veleggiatori”).
Nce sëura la Elpes ne jola i uciei de migrazion nia tan gën
sëuravia, dantaldut cun cundizions dl tëmp nia bones ie i crëps
auc y da nëif sciche n mur per ëi.
Purempò se aspitons resultac ntressanc, dantaldut ajache nchina
śën mancel te Sudtirol na nrescida cumpleta.
Chësta nrescida va inant per de plu ani. Tl prim ons laurà ora i
dac che ie bele unii abinei adum. Dal 2009 inant ons metù
a jì dis de usservazion “Greifvogelzugbeobachtungstage
- Giornate di monitoraggio dei rapaci migratori” sibe d’ansciuda
che d’autonn. Ntan i miëur mumënc dla migrazion ons cialà de tré
ite de plu persones per pudëi curì l majer numer de posć adatei
per cumpedé i grifons che passa. La sortes de grifons che pudon
udëi dantaldut ie d’ansciuda la Puiana dala surices che passa
danter fauré y merz y la Puiana dala bespies che passa de mei.
D’autonn udons de agost, dantaldut la Puiana dala bespies.
Nchina śën ons bele udù 22 sortes de grifons, danter de tei, che
ie passei ntan la migrazion (Zugvögel - migratori), che ie
restei tlo ntan l inviern (Wintergäste – svernanti) o che girova
ncantëur (Irrgäste – accidentali).
Per l fat che te Sudtirol ne sons mo nia segures de avëi abinà i
miëur posć per de tel usservazions, ie n auter nosc mpëni chël
de purvé ora mo d’autri posć che raton adatei.
Na tel nrescida possa mé avëi suzes, sce l ie truepa persones
che juda pea ativamënter tres si usservazions. Ve nvion duc a fé
pea y a se cuntaté per d’uni sort de nfurmazions.
|
